Sa milabay’ng simana, migaan-gaan ang problema nga giatubang sa lungsod sa dihang ang Provincial Government maoy mipasalig nga sila na ang mo asikaso sa mga tawo nga mouli gikan sa laing probinsya ngadto sa bisan asang lungsod. Ang pasalig, ubos sa BALIK PROBINSYA PROGRAM nga gilungsad sa national government.

Ang provincial government maoy mokuha didto sa Laguindingan International Airport, O sa pantalan, O sa bisan asang pick-up point nga ma-establisar/masabotan.

Sila ang mopahilona sa quarantine facility ug sila ang mopakaon. Ila usab padalhan ang mouli sa cash kantidad ug 2,000.00 Pesos para gastohon sa pag asikaso sa dokumento nga gikinahanglan sa ilang pag uli. Ang papel (role) sa LGU mao lamang ang coordination ug communication para ma-“link” ang tawo nga boot mouli ngadto sa mga ahensya nga gitahasan sa pag-asister ug ngadto sa probinsya.

Sa maong kahikayan, gipasabot nga ang lungsod igo nalang mokuha sa ilang sakop didto sa Malaybalay City human sa 14 ka adlaw nga korintinas gikan sa pag-abot sa nahitungdan. Kining tanan nabali-wala.

Si Mayor Melino L. Buro, mipatawag ug hinanaling tigum sa mga membro sa Inter-Agency Task Force for the Emerging Infectious Disease (IATF-EID), alas 2:00 ang oras sa hapon kaniadtong Miyerkolis, pitsa 27. Sa maong tigum, iyang gipa-ambit ang mga nahisgotan sa mga Mayores didto sa Kapitolyo nianang buntag sa samang adlaw kay gipatawag sila sa Governador.

Sumala pa, gibalik ngadto sa tagsa-tagsa ka LGU ang pag-asikaso sa mga tawo nga mopauli kay dili na magahom sa Provincial Government ang pag asikaso niini. Wala nay ilang kabotangan sa gatosan nga mipauli gikan sa laing probinsya.

Gumikan niini, nag-atubang sa bag-ong problema ang lungsod sanglit mobalik kini sa unang ang-ang sa pangandam aron maandam ang mga Barangay Isolation Unit.

Magkahurot na ang pondo sa LGU samtang nalantaw nga daghan ang mouli gumikan sa programa nga gilungsad. Obligado ang LGU sa pagdawat sa mouli; obligado nga motagana ug salakyan; obligado nga mopahilona ug mopakaon sa mouli.

Ang laing problema nga bag-o lang nahimamat mao nga dinhay mga estudyante nga gikan sa Cebu, 17 sila ka book ug ang 14 kanila pulos positibo sa coronavirus, sumala sa taho.

Kadto sila, sakay sa pribadong salakyan gikan sa Cagayan padulong sa North Cotabato.

Gikataho nga kadto sila mihapit sa Omonay kay mikaon. Ang Municipal Health Officer,Dr. Jeanaine Pearl A.Beltran mihimo gilayon sa lakang alang sa contact tracing. Sumala sa taho, ang tindera sa kan-anan mihatag pamahayag ug pamatood nga dinhay ilang gisilbihan nga mga customer niadtong gabii sa Mayo 17. Apan ang Military nga nagbantay sa Checkpoint nagdumili sa paghatag ug panahom. Busa ang Mayor nangonay sa pag-adto sa Omonay aron makisusi sa gikataho nga panghitabo.

Kabalaka: Dako ang kabalaka nga kadtong mga tindira nga nag-atiman niadtong mga lumalabay, natakdan sa sakit kon ugaling tinood nga positibo sa coronavirus kadtong mga customer nga ilang gi-entertain.

Dugang prehisyo: Naghatag ug dugang prehisyo gumikan kay kadtong mga tawo nga gikahalobilo niadtong mga lumalabay gikinahanglan nga e-korintinas.

DYOTAY’NG PAABOT.

Ang ikatulong hugna sa pagpanghatag sa bugas sugdan sa unang simana sa Junio.Adunay gidahom nga 9,212 ka pamilya ang hatagan sa tibook lungsod. Ang maong gidaghanon maoy natala nga nahatagan niadtong ikaduhang hugna sa pagpanghatag.

Kahinomdoman nga ang unang pagpanghatag, bali lang ug pito(7) ka kilo ang gigahin sa matag bobong, basi sa talaan sa kadaghan sa Households niadtong 1916. Kadto nga bugas maoy gipalit sa LGU. Ang ikaduhang hugna sa pag-apod-apod maoy gikan sa Provincial Government. Tag tunga na sa sako ang gihatag sa matag bobong. Kining ikatulong hugna maoy gipalit sa hinabang nga gikan sa national government ubos sa gitawag BAYANIHAN GRANT TO CITIES AND MUNICIPALITIES. Pito (7) ka milyon ang gipalit sa bugas.

GIANDAM NI:

ALEJANDRO S. BERDERA

Private Secretary

Designated PIO for ICS

• 

• 

Memorandum Circular No. 11 s. 2020
MANDO, SUGYOT UG PAHIMANGNO ARON SA PAGSIGURO SA SEGURIDAD MATAG GABIE TALIWALA SA PROBLEMA SA COVID-19

Agi ug pagsiguro sa matag-kaugalingon alkontra sa bisan unsang dautang elemento,

Panahon sa kagabihon, aniay mga kamanduan, sugyot ug pahimangno.

1. Mando sa mga Punong Barangay:

1.1. Lig-onon ang Barangay Tanod. Himoong regular ang pag patrolya/pagpaniid sa kagabihon.

1.2. I-imposar ang Curfew Hours

2. Sugyot sa publiko:

2.1. Niadtong makagahum, gidasig sila nga magbutang ug “suga-buntagan” sa atubangan ug likod sa balay ug sa mga ngitngit nga dapit.

2.2. Ang LGU maoy mo-instalar niadtong makagahom ug palit sa kagamitan. Mo-coordinate lang sa opisina sa Mayor pinaagi ni Mr. Andrie Jamisola aron ma schedule ang pagtaud;

2.3. Niadtong wala pay “sugang-dagitab”(electric light), gisugyot nga magbutang ug “lampara” nga buntagan atubang sa balay.

3. Pahimangno:

3.1. Niadtong tigpalakaw sa balita/istorya nga walay lig-ong kamatooran sama sa Toktok sa gabii, undangon ninyo ang walay kamatooran nga istorya aron dili kamo makahatag kahadlok ug kabalaka sa palibot. Sa higayon nga adunay motistigos sa imong/inyong mga binuang, mag-atubang ikaw/kamo ug silot.

3.2. Niadtong tinood naka-eksperencia nga gi toktok, report gilayon sa Punong Barangay ug sa Polisiya;

Gimando usab sa tanang Punong Barangay sa pag pahibalo niini nga tema/butang ngadto sa ilang katawhan sa bisan unsang paagi nga sayon ug praktikal.

Alang sa giya ug pagtoman.

Gihimo niining ika 18 sa bulan sa Mayo, tuig 2020 dinhi sa Damulog, Bukidnon,Philippines.

MELINO L. BURO

Municipal Mayor

•